Սննդի անվտանգության համար պատասխանատու են բոլորը

Գյուղատնտեսության նախարարության սննդի անվտանգության եւ անասնաբուժության պետական տեսչության կողմից այս տարվա ընթացքում իրականացվել է 1056 ստուգում, որից 1000-ը՝ մինչեւ ՀՀ կառավարության 2009 թ. մայիսի 29—ի «Ստուգումների կազմակերպման եւ անցկացման մասին» որոշումը, իսկ մնացածը՝ դրանից հետո։

Ստուգումների արդյունքում կիրառված տուգանքների եւ տույժերի արդյունքում պետական բյուջե է փոխանցվել շուրջ 54 մլն դրամ։ Ինչպես երեկ լրագրողների հետ հանդիպման ժամանակ նշեց սննդի անվտանգության եւ անասնաբուժության պետական տեսչության պետ Գրիշա Բաղյանը, տեսչության հսկողության տակ է գտնվում ոչ միայն սննդամթերքը, այլեւ սննդամթերքի հետ շփվող նյութերը։ Դրանց փորձանմուշներից հաճախակի հետազոտության են ուղարկվում լաբորատորիաներ եւ նորմային չհամապատասխանելու դեպքում ոչնչացվում են։ Տեսչությունն առանձակի հսկողության է ենթարկում նաեւ հացի ամբողջ արտադրությունը եւ իրացման գործընթացը, սակայն ոլորտում թերությունները դեռ շատ են։ Կարեւորվում է հացի տեխնիկական կանոնակարգի առկայությունը, որն արդեն մշակվել եւ ներկայացվել է կառավարության հաստատմանը։ Գ. Բաղյանի համոզմամբ՝ դա շատ ավելի կհեշտացնի տեսչության աշխատանքը։ Տեսչության կողմից իրականացվող շրջայցերը եւ ստուգումները չեն սահմանափակվում միայն մայրաքաղաքով։

Մարզերում ստուգումների արդյունքում հայտնաբերված խախտումները եւս հիմնականում վերաբերում են առանց մակնշման, ժամկետանց, առանց անասնաբուժասանիտարական փորձաքննության ապրանքների առկայությանը, անբավարար տեխնիկական եւ սանիտարահիգիենիկ պայմաններին։ Մարզային շրջայցերի ընթացքում կատարված ստուգումները ցույց են տվել, որ շատ անգամ Երեւանում եւ մյուս խոշոր քաղաքներում եղած ժամկետանց եւ առանց մակնշման ապրանքների մի մասն ազատ հոսք է ունենում դեպի մարզեր։

Անդրադառնալով ընթացիկ տարում Սիսիանում, Վանաձորում, Աշտարակում արձանագրված թունավորման դեպքերին՝ Գ. Բաղյանը նշեց, որ Սիսիանում եղել է ոչ թե սննդային թունավորման, այլ՝ ինֆեկցիոն հիվանդության դեպք։

Ինֆեկցիայի տարածողը կամ մանկապարտեզի սաներն են, կամ մանկապարտեզի աշխատակիցները։ Նրանց միջոցով ինֆեկցիան անցել է սննդի մեջ եւ հանգեցրել մասսայական թունավորման։ Վանաձորում արձանագրված դեպքը եղել է սալմոնելեզային միկրոբային թունավորման հետեւանք. լաբորատոր հետազոտությունները ցույց են տվել, որ աղցան պատրաստելու հումքը եւ միջոցները ինֆեկցիայի եւ միկրոբների տեսակետից մաքուր են եղել, սակայն սալմոնելայի որոշ քանակ հավկիթից կամ հավի մսից անցել է պատրաստված աղցանի մեջ, իսկ օգտագործված մայոնեզը նպաստավոր պայմաններ է ստեղծել այդ միկրոբների գերաճի համար։

Առողջապահության նախարարության հետ Սիսիանում եւ Վանաձորում կատարվել են աշխատանքներ, որի արդյունքում խուսափել են վտանգավոր հետեւանքներից։ Աշտարակում թունավորման դեպքը պայմանավորված է եղել խանութից գնված էկլերի մեջ ստաֆիլակոկ միկրոբի առկայությամբ։ Դրանով վարակվել է ընդամենը մեկ ընտանիք, քանի որ կարճ ժամանակամիջոցում աղբյուրը հայտնաբերվել է, եւ ձեռնարկվել են անհրաժշետ միջոցներ։

Հարցեր, պատասխաններ, մեկնաբանություններ